Ses Dosyaları

Tarayıcınız audio(ses) öğesini desteklemiyor.
Güftekâr : Koniçeli Kâzım Paşa

Bestekâr : Sebilci Hüseyin Efendi

Makam : Hüzzam

Zâlimler el vurub hep şemşîr-i canrübâya,

Kasdetdiler serâpâ "Evlâd-ı Mustafâ"ya,

Devrân olup müsâid ol kavm-i bî-hayâya,

Îsâl olundu bîdâd serhadd-i intihâya,

Kimler eder tehammül yâ Rabb bu ibtilâya,

Âmâc edüb vücûdun bin nâvek-i kazâya.

Düşdü Huseyn atından sahrâ-yı Kerbelâ'ya,

Cibrîl var haber ver "Sultân-ı Enbiyâ"ya.

Cûş eyleyüb belâya mânend-i mevc-i tûfân,

Keştî-i "Ehl-i Beyt"i kıldı şikest ü vîrân,

Maktûl olup serâser ashâb u âl-i zîşân,

Yektârev oldu ol mâh çün âfitâb-ı rahşân,

Her yandan etdi savlet hınzîr-veş yezîdân,

Sertâbepâ vücûdun zahm eyleyüb kızıl kân.

Düşdü Huseyn atından sahrâ-yı Kerbelâ'ya,

Cibrîl var haber ver "Sultân-ı Enbiyâ"ya.

Ashâb u âlinin hep kibârı vü sıgârı,

Bir bir kılub şehîden azm-i huzûr-i Bârî,

Dil-teng edüb susuzluk tâ arşa oldu sârî,

Ezvâc-ı tâhirâtın feryâd-ı bî-karârı,

Her yüzden etdi tazyîk a'dâ o şehriyârı,

Âhir çıkub elinden dâmân-ı ihtiyârı.

Düşdü Huseyn atından sahrâ-yı Kerbelâ'ya,

Cibrîl var haber ver "Sultân-ı Enbiyâ"ya.

Yârân olub serâpâ mest-i mey-i şehâdet,

Meydanda kaldı tenhâ ol mihr-i evc-i hâcet,

Bu hâl olub adûya sermâye-i cesâret,

Etrâfın aldı birden ol kavm-i pür-dalâlet,

Yetmiş iki yerinden mecrûh olub nihâyet,

Bundan ziyâde harbe Hakk vermeyüb icâzet.

Düşdü Huseyn atından sahrâ-yı Kerbelâ'ya,

Cibrîl var haber ver "Sultân-ı Enbiyâ"ya.

Ol şâh-ı dîn-penâhı tenhâ görünce düşmân,

Etdi hücûm u savlet şiddetle her tarafdan,

Bir hâle vardı âhir zahm-ı hadeng-i âhen,

Mânend-i kasr-ı cennet cisminde oldu rûşen,

Envâ'-ı yârelerden her cânibinde revzen,

Kâzım olub nihâyet bî-tâb harb ederken,

Düşdü Huseyn atından sahrâ-yı Kerbelâ'ya,

Cibrîl var haber ver "Sultân-ı Enbiyâ"ya.